Në Ditën Ndërkombëtare për Persona me nevoja të Veçanta në Prishtinë është hapur ekspozita me pikturat e punuara nga kjo kategori e shoqërisë. Kjo ekspozitë ka treguar anën e “padukshme” të kësaj kategorie të shoqërisë, ndërsa Ambasadorja Amerikane, Jacobson, ka bërë thirrje për të drejta të barabarta të të gjithë qytetarëve.
Piktura të ndryshme, kryesisht të natyrës abstrakte, të pikturuara nga persona me nevoja të veçanta, kanë përbërë ekspozitën e fundit në kryeqytet, që është hapur të martën për nderë të Ditës Ndërkombëtare të Personave me Nevoja të Veçanta.
Së bashku me punimet e këtyre personave punimet e tij i ka prezantuar edhe artisti Visar Hyseni, ndërsa për ta sensibilizuar opinionin për këtë kategori të shoqërisë, po në të njëjtin vend është dhënë edhe video e punuar nga artisti britanik, Simon McKeown, i cili ka treguar për jetën, fuqinë dhe kreativitetin e një personi me nevoja të veçanta, transmeton Kultplus.
Të dy këto projekte janë realizuar në kuadër të projektit për integrimin në shoqëri të femrave dhe meshkujve nëpërmjet aktiviteteve sportive, që është organizuar nga Komiteti Paraolimpik i Kosovës, organizata Kosovo United States Alumini (KUSA), ndërsa është mbështetur nga Ministria e Kulturës, Rinisë dhe Sportit dhe Ambasada Amerikane në Kosovë.