Eagles of Death Metal, rock bendi amerikan që u mbijetoi sulmeve të xhihadistëve në koncertin e tyre në Paris muajin e kaluar, kanë bërë një rikthim emocional në skenë, në kryeqytetin francez, të hënën në mbrëmje, teksa u shfaqën përkrah U2.
“Duam t’i paraqesim këtu njerëzit – jetët e të cilëve do të jenë përgjithmonë pjesë e Parisit. Janë vëllezërit tanë. Atyre ua grabitën skenën tri javë më parë dhe ne dëshirojmë t’ua ofrojmë skenën tonë sonte”, deklaroi Bono për Eagles of Death Metal, duke e përqafuar këngëtarin e tyre Jesse Hughes.
Së bashku interpretuan këngën e Patti Smith “People Have The Power”, e pastaj edhe “I Love You All The Time”.
Ky koncert, i mbushur me emocione të fuqishme, i mbajtur në sallën me kapacitet prej 16.000 vendesh, në AccorHotels Arena, vjen pas tragjedisë së 13 nëntorit – kur në një seri sulmesh terroriste u vranë 130 persona, 90 prej të cilëve në koncertin e Eagles of Death Metal në Bataclan. /Politiko.net
https://youtu.be/L7_rb9i34W8