Misioni i EULEX-it kur erdhi në vitin 2008 shihej si një ndër mekanizmat kryesor që do të ndikonte në uljen e kriminalitetit dhe korrupsionit në Kosovë.
Ky mision kishte një qëllim të rëndësishëm, që në fakt nuk arriti ta realizonte tërësisht, rritjen e kapaciteteve dhe monitorimin e strukturës së drejtësisë. Jo vetëm që s’arriti, por së fundi u përfshi edhe në afera korruptive, raporton KTV.
Analisti Artan Muhaxhirri thotë se ky skandal që ka përfshirë misionin e EULEX-it do të lërë pasoja në sistemin e drejtësisë kosovare. Ai thotë se njerëzit mund të kenë pasur besim në këtë mision, porse përfshirja e gjyqtarëve dhe e prokuroreve në afera korruptive përfundimisht e zbeh besimin në EULEX.
Muhaxhiri thotë se skandalet në EULEX kanë qenë të pritshme dhe kritikon këtë mision për dështim në shumicën e rasteve të rëndësishme.
Të nevojshëm EULEX-in e sheh opinionisti Arben Ahmeti, porse konstaton se ky misionin gjithmonë ka pasur ndikime politike. Ka disa ditë prej se në media është duke u raportuar për korrupsion në EULEX, transmeton Koha.net.
“Koha Ditore” ka botuar një seri shkrimesh për hetimet që po zhvillohen ndaj prokurorëve dhe gjyqtarëve të EULEX-it.