Ish- zyrtari policor Fatmir Gjurgjeali, akuzohej për veprën penale të zbulimit të fshehtësive zyrtare nga neni 347 paragraf 2, për të cilën vepër parashihej dënimi deri në 5 vjet burg.
Mirëpo në fjalën përfundimtare, prokurori i çështjes Bajram Hamitaga, bëri ricilësimin e kësaj vepre nga paragrafi 2 në paragrafin 1, për të cilën dënimi i paraparë me kodin penal është deri në 3 vjet burg.
Gjykata shpalli aktgjykimin të premten, me të cilin e gjeti fajtor të pandehurin Gjurgjeali.
“I akuzuari Fatmir Gjurgjeali është fajtor për shkak të veprës penale zbulimi i fshehtësive zyrtare nga neni 347 paragrafi 1, dhe ndaj tij është shqiptuar dënimi me kusht, duke i vërtetuar dënimin me burg në kohëzgjatje prej një viti, i cili dënim nuk do të ekzekutohet nëse në afatin prej dy viteve nuk kryen vepër të re penale”.
I akuzuari, po ashtu, u obligua që të paguajë të gjitha shpenzimet e procedurës penale, si dhe paushallin gjyqësorë në shumën prej 800 eurove.
Me këtë vendim të gjykatës, nuk u pajtua mbrojtësi i të akuzuarit Gjurgjeali, i cili paralajmëroi se do të bëjë ankesë në gjykatën e shkallës së dytë.
“Natyrisht që ne nuk jemi të kënaqur me një vendim të tillë, por është çështje e gjykatës se si do ta arsyetojë dhe ekziston edhe instancë e shkallës së dytë ku do të shqyrtohen gjërat, me siguri që do të bëjmë ankesë për arsye se një vendim i tillë, sipas meje, është një vendim jo i drejtë, që mos të them ndonjë fjalë më të rëndë…”, tha avokati Nevzati.
Aktakuza ndaj Fatmir Gjurgjealit është ngritur në maj të vitit 2012 nga Prokuroria Themelore e Prizrenit.
Ajo e ngarkonte të pandehurin se nga viti 2009 në vazhdimësi, në cilësinë e mbikëqyrësit të zyrës dhe zëvendësshefit të Njësisë së Inteligjencës Kriminale Rajonale në Prizren, i kishte dërguar pa autorizim informacione një shtetasi të huaj.
Sipas prokurorisë, këto informacione Gjurgjeali në mënyrë elektronike i kishte bartur fillimisht në e-mail-at e tij privatë, e pastaj u ka mundësuar personave të paautorizuar të kenë qasje në këto dosje./kallxo.com/