Shkruan: Skender Berisha
Fjalë maje prushi ndezur e përndezur
një grimë shkëndijë më shumë flakë
gurgullon ai shpirt – shpirtush i thelli
fjala del prej fundesh kërkund nuk ngeli
e të merr e të ngritet gjoksi tepërpjeta
sikur fryn prej Malit të Thatë me rregëtima
bie mbi liqe kaltroshin ajo fjalëvetëtima
ngriten valët sikur nositët sa të jetë jeta
bie teposhtë e tepërpjetë gjoksit me prush
fjalë e ngjeshur valë pas vale tashti po bredh
edhe djeg si nuk djeg kur shkel përmbi ledh
ngritet vjersha si pjergull plotë kokrra rrush
më tutje te zalli anija e lodhur u përpoq
nëpër prush të gjoksit tim diçka u ringjall
shkoi e t’u fërfëllua mu te guri një koran
sikur erdhi të më thotë:mos m’u lodhe jaran
21 maj 2015,Prizren