Gara për presidentin e ri të Republikës së Kosovës pritet të nxehet në “ditët e ftohta” të janarit. Deri në atë kohë, pavarësisht se nuk kanë mbetur shumë muaj në dispozicion, nuk do të bëhen publike të gjitha kandidaturat për të parin e shtetit.
Kandidaturat më të favorizuara për president janë të liderëve partiakë, që arrijë të sigurojnë me 30 nënshkrime të deputetëve, të cilët nënshkrime vështirë mund t’i sigurojnë kandidatët e pavarur, nëse nuk përkrahen nga subjektet parlamentare, shkruan ‘Zëri’.
Kosova si Republikë Parlamentare, duke u bazuar në Kushtetutë, është në përgjegjësinë e Kuvendit të Kosovës që ta zgjedhë presidentin e shtetit me votim të fshehtë. Neni 86 i Kushtetutës së Kosovës, pika 2, thotë se zgjedhja e presidentit të Kosovës duhet të bëhet jo më vonë se tridhjetë (30) ditë para përfundimit të mandatit të presidentit aktual, që i bie se Kosova duhet ta zgjedhë shefin e ri të shtetit më së largu më 7 mars të 2016, një muaj para se presidentes aktuale, Atifete Jahjaga, t’i përfundojë mandati. /Zëri/