Njohësit e politikës kosovare vlerësojnë se ky subjekt ka nevojë për ndryshime, por gara e kreut të Qeverisë me deputeten më të votuar anon nga ky i pari, për shkak të interesave që dominojnë delegatët, degët, etj.
Kuvendi i 8-të zgjedhor i LDK-së, këtë të diel, po shihet me interesim dhe pritje për ndryshime rrënjësore në këtë subjekt politik. Pritjet e tilla sa vijnë e bëhen më serioze, për shkak të garës që është paralajmëruar për pozitën e të parit të partisë.
Analistët politikë konsiderojnë se tani është shansi historik që reformat në LDK të fillojnë të jetësohen në praktikë, që ndarja në mes të lidershipit të konsumuar, të dështuar në tri palë zgjedhjeve të fundit, dhe frymës së re reformatore të ndodhë me ndryshime, që duhet të ndodhin në këtë kuvend të ri zgjedhor.
Analisti politik, Belul Beqaj, konsideron se ndryshimet janë të domosdoshme, nëse LDK-ja dëshiron që vërtetë të ecë në rrugën e frymës së re të reformave, por që në fakt është një sfidë e vështirë, pasi që zgjedhjet në këtë parti po duken si zgjedhje për kryeministrin dhe jo për liderin e partisë. Një skenar i tillë do të ishte shumë i dëmshëm për LDK-në, nëse nuk ndodhin ndryshimet që po i kërkon fryma reformatore./Kosova Sot/