Policia në Prizren ka kofiskuar një armë të një dasmori. Zëdhënësi i PK-së,Hazir Berisha tha se arma është konfiskuar, pas lajmërimit të rastit nga një qytetar anonim.
“Rreth orës 10:00, Qendra Operative e Policisë në Prizren ka pranuar një informatë nga një qytetar anonim e cila bënte me dije se tek restoranti “GOLD” në Lubizhdë janë dëgjuar të shtëna të armës. Një patrullë policore është marrë me rastin. Pas një hetimi fillestar është identifikuar i dyshuari i cili kishte qenë një dasmor dhe i cili nuk kishte respektuar ligjin mbi përdorimin e armëve me ç’rast i njëjti kishte shkrehur tetë fishekë nga pistoleta e llojit “Ekol SPECIAL 99”, kalibri 9mm”, tha Berisha.
Sipas tij, policia ka sekuestruar armën e cila rezulton të jetë pistoletë me gaz dhe tetë gëzhoja në cilësi të provës materiale të cilat do t’i kalojnë prokurorisë për procedura të mëtejme. “Është njoftuar prokurori i cili ka sugjeruar që i dyshuari të lirohet në procedurë të rregullt”, tha Berisha./PrizrenPress.com/