Gjykata e Shkallës së Parë në Lezhë ka dënuar me nga 15 vjet burg dy të akuzuar nga prokuroria për grabitjen me armë të disa shtetasve kosovarë në “Rrugën e Kombit” para një viti.
Por, për shkak të gjykimit me procedurë të shkurtuar, të pandehurit Ardit Maxhuni dhe Anton Nikolli përfitojnë uljen e një të tretës së dënimit dhe përfundimisht do të vuajnë nga 10 vjet burg secili.
Ngjarja për të cilën akuzohen Maxhuni dhe Nikolli ka zanafillën në fillim të muajit gusht 2013, kohë gjatë së cilës dy të akuzuarit në bashkëpunim me njëri-tjetrin kanë grabitur nën kërcënimin e armëve disa shtetas kosovarë që vinin në Shqipëri për pushime.
Prokuroria ka zbuluar skemën e vjedhjes me armë, ku rezulton se dy të akuzuarit dilnin në rrugë dhe vinin pengesa, kryesisht gurë të mëdhenj dhe drurë të ndryshëm, me qëllim që automjetet të pengoheshin, duke ngadalësuar shpejtësinë. Pasi ndalonin për shkak të pengesave, të dy të akuzuarit afroheshin tek automjeti dhe nën kërcënimin e armës u vidhnin sendet personale dhe vlerat monetare…