Ramush Haradinaj nuk ka dashur t’i përgjigjet akuzës së Albin Kurtit se LDK, AAK dhe NISMA janë hajna të ligës së dytë.
Haradinaj, pas takimit me Bllokun, ka thënë se deklaratat e tilla nuk janë një gjë e mirë, derisa ka thënë se kanë punë shumë më të rëndësishme se sa të merren me akuza të tilla.
“Nuk kemi pasur kohë të merremi me deklarata të tilla. Në fakt, kemi shumë punë më të rëndësishme se sa deklaratat që bëhen në publik. Normalisht, nuk është një gjë e mirë, mirëpo, nuk jemi marrë me këtë çështje”, ka thënë ai.
Kurti ulet mes “hajnave të ligës së dytë”
Një ditë pasi që i quajti hajna të ligës së dytë, Albin Kurti është ulur në një tavolinë me ta.
Kreu i LDK-së, Isa Mustafa, ai i AAK-së, Ramush Haradinaj dhe lideri i NISMA-s, Fatmir Limaj e kanë futur në mes Albin Kurtin e VV-së me të cilin po diskutojnë rreth krizës politike.
Një natë më parë, Albin Kurti i VV-së tha se në Kosovë ndahen në dy liga hajnat.
Në superligë i ka vendosur hajnat e PDK-së, ndërsa, hajnat e LDK-së, AAK-së dhe NISMES janë në ligën e dytë./Indeksonline/