Zëvendëskryeministri i Republikës, njëherësh ministri i Punëve të Jashtme, Hashim Thaçi nuk do të marrë pjesë në “Lutjet e Mëngjesit” që mbahen në Washington të Shteteve të Bashkuara të Amerikës këtë të enjte.
Në këtë ngjarje, ku do të marrin pjesë mbi tre mijë mysafir nga e gjitha bota, do të jenë edhe disa deputetë të Kuvendit të Kosovës nga partitë e koalicionit.
Zëvendësministri i Punëve të Jashtme, Petrit Selimi ka treguar për “Zeri.info” se ai dhe Thaçi kanë marrë ftesë për t’iu bashkuar kësaj ngjarje por për disa arsye nuk mund të marrin pjesë aty.
Ai mospjesëmarrjen e ka arsyetuar me mbajtjen e konferencë së sotme “Germia Hill” që do të mbahet në Prishtinë, e ku pritet të marrin pjesë zyrtarë të lart të shteteve të rajonit e më gjerë.
“Neve na kanë ftuar. Kam qenë unë edhe zv.kryeministri Thaçi. Por, për shkak të konferencës ‘Gërmia Hil’” na u ka pamundësuar të jemi aty. Po ashtu zëvendëskryeministri ka pasur të aranzhuar takimet në Iowa dhe Washington. Thjesht, nuk janë përputhur agjendat”, ka thënë Selimi.
Ndryshe, deputetët e Kosovës që do të marrin pjesë në Lutjet e Mëngjesit në SHBA janë: shefi i Grupit Parlamentar të PDK-së, Adem Grabovci, deputeti i LDK-së, Armend Zemaj, Besim Beqaj, Flora Brovina, Slobodan Petrovic, Enver Hoxhaj si dhe deputetja Teuta Rugova. /Zëri/