Kryetari i Kuvendit të Kosovës, Jakup Krasniqi ka pritur në takim, homologun e tij shqiptar Ilir Meta, me të cilin kanë biseduar për thellimin e bashkëpunimit mes dy vendeve tona.
Krasniqi tha se me Metën bashkëbiseduan për bashkëpunimin e mirë që kanë pasur dy kuvendet, por që ka vend për të përmirësuar edhe më tej bashkëpunimin e tyre.
Ndërsa, Ilir Meta tha se është këtu për të shprehur vullnetin e tij për të çuar përpara bashkëpunimin ndërmjet dy kuvendeve si një kusht për të çuar përpara marrëdhëniet mes dy shteteve.
Meta tha se ai shpreh mbështetjen e vendit të tij për dialogun mes dy vendeve, Kosovës dhe Serbisë, për normalizimin e marrëdhënieve mes dy vendeve dhe shpërbërjes së strukturave paralele dhe integrimin e tyre në jetën institucionale të Kosovës.
Krasniqi e Meta kanë komentuar edhe themelimin e një Tribunali të supozuar për krimet e luftës.
Me këtë rast Krasniqi tha se Kuvendi ende nuk ka marrë asnjë dokument zyrtar për themelimin e këtij Tribunali.
Ndërsa, Meta tha se çdo përpjekje për të vënë në diskutim luftën e popullit të Kosovës dhe UÇK-së është i pa vend.
Ilir Meta sot po qëndron në Kosovë
Kryetari i Kuvendit të Shqipërisë, Ilir Meta ka mbërri mbrëmë në Prishtinë, ndërsa sot ai do të nisë vizitën e tij zyrtare dy ditore në Republikën e Kosovës.
Gjatë qëndrimit në Kosovë Meta do të takohet sot me Kryetarin e Kuvendit të Republikës së Kosovës, Jakup Krasniqi dhe kryeministrin e Qeverisë së Republikës së Kosovës, Hashim Thaçi.
Meta do të bëjë homazhe pranë varrit të ish presidentit, Dr. Ibrahim Rugova dhe te varrezat e Jasharajve në Prekaz. Kryetari i Kuvendit të Shqipërisë, do të vizitojë edhe familjen Jashari.
Në kuadër të vizitës zyrtare në vendin tonë, Meta do të ketë takime me Isa Mustafën, kryetar i LDK-së, Ramush Haradinajn nga AAK, Albin Kurtin e VV-së, presidentin e AKR-së Behgjet Pacolli dhe kryetarin e komunës së Prishtinës, Shpend Ahmeti.
Meta në Kosovë do të zhvilloj një takim edhe me përfaqësuesit e komuniteteve pakicë në Kuvendin e Kosovës.