Qendra e Gjirit për të Drejtat e Njeriut, njofton se ISIS ka ekzekutuar në Mosul të Irakut aktivisten Samira Saleh Al-Naimi.
“Konfirmohet se një grup personash të maskuar të Shtetit Islamik kanë gjuajtur me armë zjarri dhe e kanë vrarë aktivisten në një shesh publik në qendër të Mosulit. Ajo është rrëmbyer nga Shteti Islamik në shtëpinë e saj javën e kaluar”, raportohet në njoftimin e kësaj organizate.
Avokatja e aktivistja për të drejtat e njeriut e kishte përshkruar “barbar” dëmin e shkaktuar nga Shteti Islamik mbi vendet dhe monumentet e lashta të Mosulit.
Samira Saleh Al-Naimi ka qenë një avokate dhe aktiviste e njohur për të drejtat e njeriut e cila është marrë me mbrojtjen e të paraburgosurve dhe ndihmën ndaj familjeve në nevojë në Mosul.
Qendra e Gjirit për të Drejtat e Njeriut e ka dënuar ashpër ekzekutimin e avokates së njohur, duke thënë se ky krim dhe krimet e tjera të Shtetit Islamik janë krime kundër njerëzimit.