Në koktejin e organizuar mbrëmë nga ambasada e Shteteve të Bashkuara të Amerikës në Kosovë, nuk kanë qenë të ftuar përfaqësuesit e Nisma-së dhe atyre të Lëvizjes Vetëvendosje.
Në këtë ndejë të mbajtur në njërin prej lokaleve të Prishtinës, ishin të ftuar kryetari i PDK-së, njëherësh kryeministri në detyrë, Hashim Thaçi, ai i LDK-së, Isa Mustafa si dhe Ramush Haradinaj nga Aleanca për Ardhmërinë e Kosovës.
I dyti i Nisma-së, Jakup Kransiqi në një prononcim për Indeksonline ka konfirmuar arsyet se pse nuk kanë qenë të ftuar përfaqësuesit e partisë së tij.
“Nuk kemi qenë të njoftuar, dhe s’kemi qenë aty se ai ka qenë një takim privat, me partitë parlamentare më të mëdha. Jo, jo nuk kemi pas ftesë zyrtare”, ka thënë Krasniqi nëpërmjet telefonit.
Ndërsa në pyetjen tonë se, a ka qenë ky takim për ndonjë marrëveshje ndërmjet liderëve të tri partive, PDK, LDK dhe AAK, përgjigja e Krasniqit ishte e shkurtër.
“Pyetni ata që kanë qenë, ne nuk kemi qenë”.
Mirëpo, kryetari i LDK-së, Isa Mustafa pas takimit ka deklaruar për Indeksonline se, ka biseduar me kryeministrin Thaçi, por jo për politikë.