Ka dështuar të mbahet seanca e shqyrtimit gjyqësor të çështjes, për shkak të mungesës së të akuzuarit i cili nga Prokuroria Themelore në Prizren po akuzohet se ka kryer veprën penale “dëmtim i varreve apo kufomave”.
I akuzuari Halit Muharremaj, pavarësisht se ka qenë i ftuar në mënyrë të rregullt përmes procesverbalit të seancës së mëparshme, i njëjti nuk i është përgjigjur ftesës, raporton “Betimi për Drejtësi”.
Të pranishëm në seancë kanë qenë prokurori Fatos Ajvazi, dëshmitarët Ismet dhe Sadik Muharremaj, ndërsa nuk ka prezantuar në seancë dëshmitari Sahit Muharremaj, për të cilin gjykata është informuar se i njëjti ndodhet jashtë vendit.
Në këto rrethana, gjyqtari i çështjes Lavdim Bajraktari, në mungesë të kushteve ligjore për mbajtjen e seancës ka shtyrë seancën e sotme për datën 6 maj 2021 në ora 10:30, raporton “Betimi për Drejtësi”.
Ndryshe, sipas Prokurorisë Themelore në Prizren i pandehuri Halit Muharremaj po akuzohet se më 20 janar 2018, në orë të papërcaktuar, në fshatin Gjinoc, Komuna e Suharekës, saktësisht në varrezat e familjes Muharremaj, i pandehuri pa autorizim, i heq dhe dëmton tre varre, në atë mënyrë që ditën kritike shkon në vendin kritik dhe pa u vërejtur nga askush, i dëmton dy varre të prindërve të tij dhe një varr të Q. M., prindi i tani të ndjerit D. M., duke i heq pllakat e granitit të pjesës së sipërme të anës së kokës dhe i vendos në tokë, me ç’rast të dëmtuarve i’u shkakton dëm material. /BetimipërDrejtësi