Kandidati i Lëvizjes Vetëvendosje! për kryetar të Komunës së Malishevës, Alban Krasniqi , vizitoi sot fshatin Lladroc. Në këtë takim të shkurtër me qytetarë në sallën e pritjes së këtij fshati, Krasniqi u informua për shërbimet publike, si gjendjen e rrugëve, sistemin energjetik të vjetruar, ambulancën jo funksionale, papunësinë dhe varfërinë në këtë fshat.
Banorët e këtij fshati, ndërkaq i kanë thënë kandidatit të VV-së Krasniqi se ka një injorim nga pushteti për fshatin Lladroc. Ata kanë thënë se ka projekte të realizuara në mënyrë jo serioze dhe mungesë serioziteti nga ana e pushtetit. Ata u shprehen të shqetësuar edhe për rrugët që ka marr vendi në përgjithësi, duke përmendur cilësinë në arsim, mungesën e mbështetjes për bujqësi dhe për mungesën e shërbimeve shëndetësore.
Pas takimit kandidati Alban Krasniqi vizitoi lapidarin e Dëshmorëve të Kombit të rënë në luftën e UÇK-së dhe shkollën e fshatit. Pas kësaj, Krasniqi bëri një vizitë edhe në fermën e një qytetari që merret me rritjen e gjedheve dhe vizitoi një bletar.
Kandidati për Kryetar të Komunës, së bashku me kandidatët për Kuvendin Komunal u informuan nga qytetaret e Lladrocit për gjendjen e tanishme, dhe bashkë me ta folën për zgjidhjet të cilat nuk janë të vështira vetëm duhet vullnet dhe përkushtim. /PrizrenPress.com/