Klubi i Bashkimi duket se ka marrë një ‘goditje’ të rëndë, pasi lojtari i tyre kyç, Jayveous McKinnis, ka pësuar një lëndim serioz dhe sipas raporteve të para shëndetësore pritet të mungojë deri në fund të sezonit të rregullt, ka mësuar kështu AsistiOnline.com.
Kjo është një humbje e madhe për ekipin prizrenas, duke pasur parasysh kontributin e jashtëzakonshëm të McKinnis gjatë këtij sezoni.
McKinnis ka qenë një nga lojtarët më të dalluar të Bashkimit. Në 20 ndeshje të zhvilluara, ai ka regjistruar mesatarisht 12.2 pikë dhe 10.4 kërcime për ndeshje, duke arritur shpeshherë dyshifror të dyfishtë (double-double). Performanca e tij ka qenë kyçe në sukseset e ekipit, duke ndihmuar Bashkimin të arrijë 14 fitore dhe 6 humbje deri më tani.
Një nga paraqitjet më të spikatura të McKinnis ishte në fitoren kundër Vëllaznimit, ku ai realizoi 24 pikë dhe 20 kërcime, duke dominuar plotësisht në parket. Gjithashtu, në ndeshjen kundër Golden Eagle Yllit, ai kontribuoi me 19 pikë dhe 20 kërcime, duke u shpallur lojtari më i mirë i asaj jave në Superligë.
