Komanda e Batalionit të dytë “Ruzhdi Salihu” të Ushtrisë Çlirimtare të Kosovës në krye me komandant Ramiz Qeriqi- Luani, nëpërmjet një komunikate për media kanë reaguar kundër pllakës së ngritur në Gorozhup të Hasit për mos përfshirjen e të gjithë ushtarëve të mbijetuar në këtë pritë të 14 dhjetorit të vitit 1998.
Ish-komandant Luani, i cili njëherësh është këshilltar në KK të Lipjanit nga radhët e PDK-së nëpërmjet një komunikate për media ka thënë se batalionit të tyre në këtë pikë më 14 dhjetorit të vitit 1998 i kanë rënë dëshmorë 12 ushtarë, ndërkaq shumë të tjerë janë të mbijetuar.
“Nga të mbijetuarit në këtë pllakë mungojnë katër luftëtarë, tani veteran dhe invalid të UQK-së të batalionit të dytë “Ruzhdi Salihu” nga komuna e Lipjanit, të cilët nuk janë të përfshirë në pllakë. Andaj kërkojmë përgjegjësi nga Qeveria e Kosovës dhe organizatorët për mos përfshirjen e emrave të tyre në këtë pllakë. Kërkojmë që brenda një periudhe shumë të shkurtër të vendosen edhe emrat e tyre”, thuhet në komunikatë. Sipas tyre nëse nuk reagojnë institucionet përkatëse do të ngritin padi penale ndaj organizatorëve dhe Qeverisë së Kosovës.
“Emrat e këtyre ushtarëve të cilët nuk janë përfshirë në këtë pllakë janë: Beqir Luma nga fshati Kraishtë, Osman Zeqiri nga fshati Varigovc, Avni Rizani nga fshati Krojmir si dhe Hazir Rizani nga fshati Krojmir”, thuhet më tej në komunikatë.
