Është dashur që publikimi i listave fillestare të veteranëve, invalidëve, dëshmorëve, pjesëmarrësve dhe të internuarve të UÇK-së të përfundonte më 20 shkurt të këtij viti, shkruan sot Koha Ditore.
Kështu kishte premtuar më 9 shkurt kryetari i Komisionit qeveritar për verifikim të statusit të veteranëve, invalidëve, dëshmorëve, pjesëmarrësve dhe të internuarve të UÇK-së, Agim Çeku, dy ditë para fillimit të publikimit të këtyre listave.
Por deri më tani janë publikuar vetëm listat e tri zonave operative, nga shtatë sa janë gjithsej. Janë publikuar listat e zonave të Llapit, Karadakut dhe Neredimës, ndërkohë që nuk janë bërë ende publike listat e Zonës së Dukagjinit, të Pashtrikut, Shalës dhe Drenicës.
Këto vonesa nuk janë pritur mirë nga kryetari i Këshillit për Mbrojtjen e të Drejtave të Luftëtarëve të UÇK-së, Xhevdet Qeriqi, i cili ka dhënë ultimatum deri në fund të javës për publikim të tyre.
Ndryshe Qeriqi ka kërcënuar me protesta në rast të mospublikimit të listave.