Autoritetet lokale e ato qendrore të trashëgimisë kulturore kanë refuzuar kërkesën, përkatësisht projektin ideor të Komunës së Prizrenit për ndërtimin e infrastrukturës për qasje në Kalanë e qytetit.
Informatat rreth kësaj çështjeje janë shpalosur në ditën që gazeta ka raportuar për refuzimin që Instituti i Kosovës për Mbrojtjen e Monumenteve ia ka bërë kërkesës së Bashkësisë Islame në Prizren për rindërtimin e xhamisë në Kala, shkruan sot “Koha Ditore”.
Pavarësisht refuzimit të projektit ideor për teleferik, organet komunale të Prizrenit tashmë kanë iniciuar procedurat e prokurimit për këtë projekt.
Përderisa organet e Ministrisë së Kulturës dhe Këshilli për Trashëgimi Kulturore i Qendrës Historike të Prizrenit kanë theksuar se projekti ideor për ndërtimin e infrastrukturës për qasje në Kala është në kundërshtim me kushtet e dhëna nga Instituti Arkeologjik i Kosovës dhe me dispozitat e Ligjit për trashëgimi kulturore, në anën tjetër zyrtarët komunalë kanë vlerësuar se autoritetet e trashëgimisë kulturore i kanë shkelur afatet ligjore për dhënien e përgjigjes ndaj kërkesës.