As para e as pas luftës, banorët e komunës së Malishevës, që janë të punësuar, nuk patën mundësi asnjëherë t’i dërgojnë fëmijët e vegjël për kujdes në çerdhe.
Kësaj komune i mungon një çerdhe publike.
Në bazë të një plani urbanistik në rrugën “Hamdi Berisha” të lagjes “Mirditë” ishte paraparë vendi ku do të ndërtohej çerdhja. Por, me kalimin e viteve, çerdhes iu ndërrua destinacioni, të cilën komuna e pa të arsyeshme ta ndërtojë diku tjetër, derisa truallin e kompensoi, raporton KTV.
Banorët e kësaj lagjeje ankohen se tash ku është duke u ndërtuar çerdhja është vend shumë i papërshtatshëm dhe shumë larg qytetit.
Por, zyrtarët komunalë ndërrimin e vendit për ndërtimin e çerdhes e kanë parë më se të nevojshëm, transmeton Koha.net. Ndërsa, vonesën e ndërtimit të këtij objekti e arsyetojnë me mungesë të mjeteve financiare.
Banorët e 40 shtëpive hall e kanë edhe mosasfaltimin e rrugës, e cila sidomos gjatë stinës së dimrit u shkakton vështirësi të mëdha në qarkullim. Zyrtarët komunalë thonë se kjo rrugë do të asfaltohet kur t’i vijë radha.