Kosova ka vite që në sistemin e arsimit të lartë po i zbaton kriteret dhe standardet e Procesit të Bolonjës, ndonëse vendi ende nuk është anëtar i këtij procesi.
Zyrtarë të Ministrisë së Arsimit thonë se kjo është më shumë çështje politike sesa e zbatueshmërisë së kritereve, shkruan Tribuna.
Drita Kadriu, këshilltare e ministrit të Arsimit, Ramë Buja, thotë se Ministria e Arsimit tashmë është në përfundim e sipër të kompletimit të të gjitha dokumenteve për anëtarësim në procesin e Bolonjës.
Ajo tha se Ministria e Arsimit do t’i dërgojë këto dokumente në Bolonjë gjatë datës 28 të këtij muaji.
“Është themeluar grupi. Një vit është punuar në përgatitjen e Ministrisë së Arsimit për t’u bërë pjesë e këtij procesi. Tani jemi në fazën finale të përgatitjes për aplikim”, thotë ajo.
Ndërkaq Kosova ka aplikuar dy herë për t’u bërë pjesë e këtij procesi, por është refuzuar për arsye se nuk ishte ende shtet i pavarur.
Ndërkohë tashmë MASHT-i ka themeluar grupin për përgatitjen e aplikimit në Bolonjë, ku pritet që kjo të bëhet në nëntor të këtij viti. Kështu, këtë vit Kosova pritet të aplikojë për anëtarësim në Zonën Evropiane të Arsimit të Lartë.