Kandidati i LDK-së për kryetar të Prizrenit, Eqrem Kryeziu, ka komentuar rezultatin zgjedhor të 3 nëntorit. Ai vlerëson se procesi zgjedhor në këtë qytet nuk ka shkuar mirë. Sipas tij, gjatë votimeve ka pasur edhe parregullsi. “Procesi zgjedhor është përshkruar me disa parregullsi të cilat kanë ndikuar në rezultat”, tha Kryeziu për “PrizrenPress”.
Bazuar në rezultatet preliminar të KQZ-së kandidati i LDK-së, Eqrem Kryeziu ka fituar 25.22 për qind të votave, ndërkaq ai i PDK-së Ramadan Muja 37.08 për qind.Kryeziu dhe Muja me 1 dhjetor do të shkojnë në balotazh për kryetar të Prizrenit.
Ndërkaq, Kryeziu numëron edhe parregullsitë që janë shënuar gjatë procesit zgjedhor në qendrat e vendvotimeve. Ai tregon se në ditën e zgjedhjeve kanë munguar 5 vula.Përveç mungesës së vulave, sipas tij, votuesve iu është ndryshuar vendvotimi.”Listat e votuesve i kanë dërgu në vende tjera”.
Sipas tij, në mbrëmje gjatë procesit zgjedhor po ashtu në Zhupë është ndalur edhe rryma. “Sigurisht që këto kanë ndikuar edhe në rezultat”.
Kryeziu nuk mendon se në humbjen e tij ka ndikuar koalicioni parazgjedhor që PDK-ja ka bërë me partitë e minoriteteve në Prizren. “Jo, jo nuk ka pasur kurrfarë ndikimi ai koalicion. Përkundrazi, kandidati i PDK-së ka pësuar disfatë me këtë koalicion, sepse krahasuar me zgjedhjet e kaluara ka pasur 8 mijë vota më pak”.
Ai thotë se LDK-ja nuk është në negociata me asnjë subjekt politik për formimin e ndonjë koalicioni parazgjedhor për balotazh. “Jemi duke i pritur rezultatet nga KQZ-ja. Nuk kemi negociuar me asnjë parti politike, edhe pse koalicionet në vendet që kanë pakë demokraci bëhen pas zgjedhjeve e jo para zgjedhjeve”. /PrizrenPress.com/