Kryesusi i Kuvendit të Prizrenit Kujtim Gashi nuk dëshiron të flasë shumë për akuzat që kuvendari i PDK-së, Alush Shala ka bërë në drejtim të tij dhe kryetarit të Komunës Ramada Mujës.
“Nuk besoj që ka qenë akuzë, por shqetësim, prandaj e mirëkuptoj”, ka thënë shkurt Gashi për “PrizrenPress”.
Ndërkaq, kuvendari i PDK-së në Prizren, Alush Shala,para dy ditësh ka reaguar pas vënies së gurthemelit të objektit të Qendrës Kulturore Boshnjake, për shkak se nuk është ftuar në ceremoninë e prerjes së shiritit.
Ai, në llogarinë e tij në Facebook, kishte shkruar se është i papranueshëm fakti se si përfaqësues (ai dhe kuvendarja Fahrije Bytyçi) të zgjedhur të banorëve të lagjes “11 Marsi” ku do të ndërtohet ky objekt, dhe si kryetar i nëndegës së partisë në këtë lagje, nuk janë ftuar nga kryetari i Komunës dhe kryesuesi i Kuvendit.
“Turpi nuk ka kufi. Sot në lagjen 11 Mars vëhet gurthemeli i Qendrës Kulturore Boshnjake po nuk ftohemi ne si përfaqësues të zgjedhur të kësaj lagje dhe njëherit edhe si kryetar i kësaj nëndege”, pat shkruar Shala.
Ai ka thënë se gurthemeli është vënë nga njerëz që nuk kanë marrë asnjë votë në lagjen “11 Marsi”.
“Gurthemelin e vënë ata që nuk e kanë marrë asnjë votë në këtë lagje”.
Shala për këtë çështje fajëson drejtpërdrejt kryetarin Ramadan Muja dhe kryesuesin Kujtim Gashi.
“Në emër të kryesisë së nëndegës dhe në emër të dy kuvendarëve shprehi revoltën për veprime të pahijshme si të kryetarit ashtu edhe të kryesuesit të komunës”, ka shkruar Shala. /PrizrenPress.com