Kuvendi i Shqipërisë mbyll të enjten punimet e sesionit të dytë parlamentar të Legjislaturës së VIII-të. Seanca e fundit e tij parashikohet të jetë e gjatë për shkak të axhendës së ngjeshur dhe çështjeve të rëndësishme që do të miratohen. Rendi zyrtar i punimeve të Kuvendit, ku opozita pritet të mos jetë e pranishme, përfshin rreth 16 pika, ndërsa për votim janë disa projektligje të mbartura nga seanca e kaluar, miratimi i të cilave kërkon shumicë të cilësuar (84 vota).
Punimet e sotme në parlament parashikojnë diskutimin e një sërë pr/ligjesh me natyrë ekonomike, sociale, por dhe atyre në fushën e sigurisë, ndërkohë që për nga rëndësia kryefjala e seancës është drafti i reformës territoriale, i cili gjithashtu kërkon 84 vota.
Maxhoranca e majtë pritet të konfirmojë shumicën e cilësuar në parlament, për miratimin e një numër pr/ligjesh,ndryshe nga sa ndodhi një javë më parë kur disa deputetë të saj bojkotuan votimin e drafteve të rëndësishme për reformën në drejtësi.