Sekretari organizativ i AAK-së, Blerim Kuçi, është shprehur i bindur se kjo parti në zgjedhjet lokale të 3 nëntorit do t’i fitojë mbi 20 për qind të votave. Ai ka thënë se, përveç komunave ku aktualisht qeveris AAK-ja, do të dalë fituese edhe në komuna të tjera. “Jemi të sigurt se në këto zgjedhje do ta kalojmë pragun e arritur në zgjedhjet e 2009-s. AAK-ja në ato zgjedhje ka marrë 18.7 për qind. Jemi duke punuar dhe duke bërë përpjekje maksimale për të kaluar këtë shifër dhe për të fituar mbi 20 për qind në zgjedhjet e 3 nëntorit”, ka thënë Kuçi në intervistën për “Epokën e re”.
Kuçi u ka bërë thirrje Isa Mustafës dhe Ramush Haradinajt të mendojnë për një koalicion të ardhshëm AAK – LDK. “Votuesit i obligojnë, qoftë z. Mustafa qoftë z. Haradinaj, t’i përmbahen kësaj vije: një koalicioni të mundshëm AAK – LDK ose LDK – AAK”, ka thënë Kuçi, duke shtuar se do të ishte mirë që në krye të qeverisë së ardhshme të vijë Ramush Haradinaj.