Lidhja Demokratike e Kosovës (LDK) në Prizren, ka reaguar ndaj kanosjes së kryetares së NDS-së, Emilija Rexhepi.
“Dega e Lidhjes Demokratike të Kosovës në Prizren shpreh indinjatën dhe zemërimin më të thellë për rastin e kidnapimit me qëllim kanosjeje të vajzës së deputetes dhe Kryetares së NDS, Emilija Rexhepit”, thuhet në reagimin e LDK-së në Prizren.
Emilija Rexhepi, e cila është edhe deputete në Kuvendin e Kosovës, ka shprehur dyshimin se konflikti me PDK-në në Prizren është bërë shkas që persona të panjohur ta rrëmbejnë vajzën e saj për disa minuta.
“Vajzën time e kanë rrëmbyer dy persona dhe e kanë lëshuar mëpas në mënyrë që ajo të më përciellë porosinë se “nëna jote duhet të ketë kujdes se çfarë po bën”, ka thënë Rexhepi për Koha Ditore.
LDK-ja në Prizren vlerëson se ”ky rast tregon që elementet kriminale të parapolitikës përmes kërcënimeve dhe shantazheve po duan të shuajnë çdo zë ndryshe dhe shfaqjeve të mospajtimit”.
“Kërcënimi i familjares së pafajshme të një politikane prizrenase vetëm pse ajo shfaqi një mospajtim për një projekt komunal të Qeverisë lokale paraqet një akt barbar, nga e cila duhet të distancohemi të gjithë”.
“Heshtja para këtij akti makabër na bën të gjithëve bashkëpergjegjës dhe fajtor që nesër këto akte të ndodhin të gjithëve pa dallim”.
“Duke shprehur edhe njëherë bindjen që familja është e shenjtë, LDK fton organet e rendit që sa më shpejtë të zbulohen dhe të vihen para drejtësisë autorët dhe inspiruesit e këtij akti qyqar”. /PrizrenPress.com