Kryesia e Degës së LDK-së në Prizren, edhe njëherë ka shprehur shqetësimin e vet për gjendjen e llahtarshme të krijuar në arsimin prizrenas.
“Pretendimet apo konstatimet e gazetarit Rami Berisha, janë vërtet një alarm për institucionet hetuese që të ndërmarrin hapat e nevojshëm në lidhje me këto probleme të shkaktuara në arsim, për të cilat konsiderojmë se kanë filluar të shkaktojnë edhe trauma te qytetarët e Prizrenit, sidomos të asaj kategorie arsimore, të cilët me kualifikimet e tyre profesionale, assesi nuk po mund të gjejnë veten e tyre si pasojë e diskrimineve të të ashtuquajturës konkursomani të stilit alla PDK, dhe nga kjo konkursomani është krijuar atmosferë dëshpëruese për persepktivën e arsimit të mirëfilltë”, thuhet në komunikatën e LDK-së në Prizren.
“LDK, dega në Prizren, vazhdimisht ka ngritur zërin kundër këtyre keqpërdorimeve dhe abuzimeve të drejtuesve të arsimit në Prizren, ku janë të panumërta skandalet e këtyre zyrtarëve abuzues me detyrën, duke filluar nga fenomeni i pagimit të militantëve të PDK-së të cilët me vite kanë marrë të ardhura të rregullta mujore pa punuar fare në arsim, e deri te abuzimet e fundit me pranimin e militantëve të PDK-së nëpër vende pune si mësimdhënës të pakualifikuar, e deri te më e tmerrshmja shitja e vendit të punës në arsim”./PrizrenPress.com/