Kuvendi i Komunës së Malishevës, ka vazhduar sot mbledhjen e jashtëzakonshme, lidhur me gjendjen e krijuar në arsimin e Malishevës, pas shprehjes së pakënaqësisë nga ana e disa ish mësimdhënësve, e për çka një grup i anëtarëve të Kuvendit të Komunës, kishin kërkuar mbledhje të jashtëzakonshme, me datë 11 shtator, por e cila ishte ndërprerë.
Në këtë vazhdim të mbledhjes, disa nga anëtarët e KK, kryesisht të opozitës, shprehën, siç thanë ata “shqetësimin lidhur me largimin e disa mësimdhënësve nga procesi mësimor dhe zëvendësim i tyre me militant partiak, si dhe për mosrespektim të bazës ligjore dhe të disa parregullsive”.
Të gjitha këtyre shqetësimeve, ju janë përgjigju kryetari i Komunës së Malishevës, z.Ragip Begaj dhe drejtori i arsimit në Malishevë, Blerim Thaçi. Fillimisht drejtori Thaçi, sqaroi se “vendet e lira të punës janë shpallur për 148 vende, në të gjitha shkollat e Komunës së Malishevës dhe se konkursi është shpallur në bazë të rekomandimeve nga Ministria e Arsimit, ku nga 1616 aplikantë, janë pranuar 148 prej tyre, dhe të gjithë me kualifikim përkatës”.
Ndërsa kryetari Begaj, duke ju drejtuar anëtarëve të kuvendit, tha se “ realisht ka filluar të vendoset një rend në shkollat e Malishevës, dhe qëllimi im është, që ti eliminoj dukuritë negative në shkollat tona, por këtë mund ta bëjë vetëm me ndihëm e juaj. Sa i përket konkursit dhe pranimit të kuadrit në shkolla, ju garantoj se qëllimisht nuk është bërë asnjë shkelje, por në rast se ka ndonjë rast të shkeljesh, gjatë pranimit të kuadrit, jam në krah të tyre, për gjetjen e zgjidhjes, por në mënyrë ligjore”./PrizrenPress.com/