Sot në oborrin e shkollës në fshatin Marali, u bë zbulimi i bustit të dëshmorit të kombit, Ruzhdi Gjyliqi, i cili kishte rënë 16 vite më parë në betejën e Rahovecit. Zbulimin e bustit e bënë, nëna e dëshmorit, kryetari i Malishevës Ragip Begaj, ish kryetari i Malishevës Isni Kilaj (ish komandant i njësisë “Lumi” të UÇK-së), zv/ministri në detyrë në MPMS Fatmri Shurdhaj dhe bashkëluftëtari i dëshmorit Nuhi Hoxha.
Fillimisht për biografinë e dëshmorit, foli Avdullah Bekolli, bashkëluftëtar dhe bashkë kohanik i dëshmorit Ruzhdi Gjyliqi. Bekolli foli për angazhimet e dëshmorit në çështjen kombëtare dhe angazhimin në UÇK, deri në rënien e tij, në betejën e Rahovecit, i rënë me 24 korrik, ku bie për të mos vdekur kurrë.
Ndërsa, kryetar i Malishevës, Ragip Begaj, tha se kujtimet e dëshmorit, do të jenë gjithherë në mendjen tonë dhe vepra e tyre do të jetë gjithmonë në historinë e popullit shqiptar.
”Kujtimet e dëshmorit, do të jenë gjithherë në mendjen tonë dhe vepra e tyre do të jetë gjithmonë në historinë e popullit shqiptar, ndërsa ju si familje, bëhuni të fortë dhe të jeni krenar për sakrificën tuaj”, tha Begaj. Ai më pas i uroi për skalitjen në bronz të bustit të dëshmorit.
Ndërkaq, ish komandanti i njësisë “Lumi”, të UÇK-së, Isni Kilaj dhe ish kryetar i Malishevës, tha se është nderë dhe ka qenë nderë të jesh pjesë e Ushtrisë Çlirimtarë të Kosovës.
“Një prej betejave më të mëdha dhe më të rëndësishme ishte ajo e Rahovecit, ku Malisheva dha shumë dëshmorë, në mesin e tyre ka rënë edhe Ruzhdi Gjyliqi”, tha Kilaj.
Kurse, zv/ministri në MPMS, Fatmir Shurdhaj, foli për veprën e dëshmorit, si dhe për nevojën e mbrojtjes me ligj të luftës së Ushtrisë Çlirimtarë të Kosovës, për respektimin e kësaj vlere nacionale.
Edhe kryetari i degës së LDK-së në Malishevë, Januz Kastrati, i uroi për bustin, të gjithë banorët e Maralisë dhe bashkëluftëtarët e dëshmorit dhe në veçanti e uroi familjen Gjyliqi. /PrizrenPress.com/