Ishte një fundjavë dashurie në qytetin e luftës. Fillimisht erdhi dasma. Një prijës kryengritës i veshur me uniforma kamuflazhi dhe me krahun e djathtë të thyer ka marshuar në drejtim të zyrës kryesore të regjistrit civil me të dashurën e tij për të formalizuar ceremoninë e tyre të martesës.
Në platformën para objektit të komunës kanë marrë pjesë qindra persona. Të gjithë kanë shprehur dëshirat e tyre që çifti të ketë jetë të lumtur dhe të trashëgohen.
Martesa, pjesa më e madhe e së cilës është emetuar drejtpërdrejt në një televizion rus, ka qenë e para e regjistruar në Republikën e vetëshpallur Popullore të Donetskut.
Çifti i parë i Republikës
Por një punëtor që punonte në njërën prej zyrave të komunës – i cili nuk ka dashur të identifikohej nga frika se do të mund të pasonte hakmarrja e autoriteteve kryengritëse – ka thënë se çifti nuk e ka zyrtarizuar martesën me kurrfarë dokumenti, dhe se çifti i lumtur, që është identifikuar si Arsen Pavlov dhe Elena Kolenkina prej agjencisë amerikane të lajmeve AP, në fakt nuk është martuar legalisht sipas asaj që e kërkon ligji ukrainas.
Por në këtë rast askush nuk ka dashur të merrej me këto punë. Të gjithë i kishin bërë sytë katër kah çifti i ri. Nusja kishte veshur fustanin e bardhë të gjatë deri në fund të këmbëve, me vellon e hedhur në kokë. Ajo kishte edhe një armë që i ishte hedhur prapa shpinës. Ajo kishte hedhur një fjongo të zezë të Shën Gjergjit, që është bërë simbol i separatistëve prorusë, të cilët janë tërhequr në Donetsk dhe Luhansk, ku po i ruajnë pozicionet e fundit kundër forcave qeveritare ukrainase, që po mundohen të rimarrin kontrollin anembanë vendit…/Koha Ditore/