Enver Sulaj
Vjenë, 22 mars
Gjatë qëndrimit njëjavor në Vjenë e vizitave të shumta këtu, maturantët e Gjimnazit gjerman “Loyola” nga Prizreni qëndruan dje në selinë e Kombeve të Bashkuara në këtë metropol evropian. Nxënësit u njohën me historikun e themelimit, funksionimin dhe misionin e OKB-së.
Ata, poashtu ndoqën disa video-materiale lidhur me misionet paqësore në botë, rreziqet e ndryshimeve klimatike dhe punën e agjensive të OKB-së. Në kryeqytetin e Austrisë nxënësit kanë vizituar Pallatin perandorak Schonbrun, Operën prestigjioze të Vjenës, Muzeun Botëror ku ruhen shpata dhe përkrenarja e Skënderbeut, Katedralen e Shën Stefanit dhe institucionet tjera të rëndësishme kulturore e historike, që tërheqin vazhdimisht vizitorë nga mbarë bota.
Aktualisht në Vjenë studion një kontigjent i theksuar studentësh nga Kosova, shumë prej tyre edhe nga Gjimnazi “Loyola”, të cilët po arrijnë rezultate të dalluara në jetën akademike vjeneze.
