Lionel Messi tani numëron 102 gola me fanellën e kombëtares së tij, Argjentinën.
Sulmuesi i Paris Saint-Germain e arriti këtë shifër në orët e hershme të mëngjesit të së mërkurës (me kohën tonë lokale) në ndeshjen miqësore ndaj ishullorëve të Caracao.
Kampionët e Botës triumfuan me shifrat 7:0, teksa Lionel Messi shënoi një tre-golësh.
Ishte pikërisht shtatë herë fituesi i Topit të Artë ai që hapi llogaritë e sfidës në minutën e 20-të.
Një gol special për numrin 10 të amerikano-latinëve duke qenë se bëhej fjalë për golin numër 100 me fanellën e kombëtares së tij.
Megjithatë, mbrëmja u bë edhe më e bukur për yllin e PSG-së, që shënoi edhe dy herë të tjera në pjesën e parë (minutat 33 dhe 37) ndërsa mes golave të tij shënuan edhe Nico Gonzalez në minutën e 23-të dhe Enzo Fernandez në të 35-tën, për ta mbyllur pjesën e parë me rezultat 5:0.
Në pjesën e dytë, mes zëvendësimeve të shumta, Argjentina e uli ritmin duke shënuar vetëm dy gola me anë të Di Maria-s që realizoi nga penalltia në minutën e 79-të dhe Montiel që realizoi golin e shtatë të sfidës tre minuta para fundit të lojës. Albanian Post