Rasti “Dehari” duhet t’i merret Prokurorisë Themelore në Prizren, dhe një gjë të tillë mund ta bëjë vetëm Kryeprokurori i Shtetit, Aleksandër Lumezi, ka thënë hulumtuesi i Institutit të Kosovës për Drejtësi, Ehat Miftaraj.
Sipas Miftarajt, Kryeprokurori i Shtetit i ka në dispozicion dy rrugë ligjore që këtë lëndë ta transferojë për hetim të mëtutjeshëm në Prokurorinë Speciale, shkruan sot “Koha Ditore”.
Ai ka thënë se i gjithë zinxhiri që ka marrë pjesë në një mënyrë apo tjetër në hetimin e këtij rastit kanë imunitet dhe nuk mund të ndiqen, përveç nëse do të mund të vërtetohet se veprimet e tyre janë shkelje e detyrave zyrtare e që hyjnë në fushën penale.
Sipas Miftarajt, prokurori i rastit, Metush Biraj, nuk duhet të konsiderohet “fajtori” i vetëm për mostrajtim adekuat të kësaj lënde, por të gjitha hallkat e sistemit prokurorial. Në këtë drejtim, sipas tij, kjo lëndë jo që nuk mund t’i besohet vetëm Birajt, por as Prokurorisë Themelore në Prizren. Miftaraj ka thënë se kjo prokurori nuk ka resurse profesionale dhe mundësi që këtë lëndë ta trajtojë me profesionalizëm.