Ministria e Kulturës, Rinisë dhe Sportit (MKRS), e cila udhëhiqet nga anëtari i LDK-së Kujtim Shala, gjatë vitit që lam pas ka punësuar tre persona duke mos përfillur procedurat përkatëse.
Zyra Kombëtare e Auditimit (ZKA) në të gjeturat e saj ka identifikuar se Ministria e Kulturës ka punësuar tre persona, ku dy prej tyre ishin punësuar pa kërkesë nga departamentet përkatëse.
“Nga tri (3) dosjet e personelit të angazhuar si punëtorë me marrëveshje për shërbimeve të veçanta, vërejtëm se të angazhuarit ishin pranuar pa procedura të rekrutimit, ndërsa për dy (2) nga ta nuk kishte as kërkesë nga departamentet përkatëse”, thuhet në raportin e Auditorit Gjeneral për MKRS-në, vitin 2016.
Auditori i Përgjithshëm ka paraparë se mospërfillja e procedurave të punësimit rrezikon punësimin e personave jo kompetent për pozita përkatëse.
Ajo i ka rekomanduar ministrit Shala se duhet të sigurojë se punonjësit me kontrata për shërbime të veçanta të angazhohen vetëm në rastet kur ka kërkesa specifike.