Ministria e Shëndetësisë së Kosovës është shprehur me kritika të forta për institucionet e ndryshme ndërkombëtare, teksa ka falënderuar publikisht Qeverinë e Shqipërisë, me në krye kryeministrin Edi Rama, për mundësinë e vaksinimit të një pjese të personelit shëndetësorë në Kukës.
MSH-ja ka ironizuar me institucionet ndërkombëtare, duke thënë se ato tërë kohën kanë mbajtur ligjërata për “qasjen dhe mundësitë e barabarta” në vaksinat.
“Në kohën kur institucionet e ndryshme ndërkombëtare, të cilat gjatë gjithë pandemisë shteteve të Ballkanit u kanë mbajtur ligjërata për “qasjen dhe mundësitë e barabarta” dhe kur “solidariteti” i proklamuar prej tyre për sigurimin e vaksinave kundër COVID-19 është tretuar nga “nacionalizmi” i vaksinave, ndihma e Shqipërisë për Kosovën, ka peshë edhe më të madhe dhe tregon se edhe të vegjlit mund të ja dalin kur punojnë së bashku dhe nuk u mungojnë vlerat”, thuhet një njoftimin e MSH-së.
Ministria e Shëndetësisë ka shprehur falënderim për të gjithë zinxhirin qeverisës shqiptar për ndihmat rreth vaksinave.
“Në emër të Ministrisë së Shëndetësisë të Republikës së Kosovës falënderojmë Qeverinë e Republikës së Shqipërisë dhe Ministrinë e Shëndetësisë dhe të Mbrojtjes Sociale, përkatësisht kryeministrin Rama dhe ministren Manastirliu, për mundësinë që u dhanë një numri të konsideruar të profesionistëve shëndetësorë nga Kosova që të vaksinohen kundër COVID-19 në Kukës. Gjithashtu, një falënderim i veçantë edhe për profesionistët shëndetësorë të Shqipërisë që me etikë dhe profesionalizëm të lartë administruan dhënien e vaksinave tek kolegët e tyre kosovarë përgjatë këtyre dy ditëve, bashkë me të gjithë ata që kontribuuan në realizimin e vaksinimit që si akt, përtej çdo simbolike, tregon rëndësinë e bashkëpunimit midis dy shteteve në funksion të mbrojtjes sa më adekuate kundër COVID-19”, thuhet ndër të tjera në njoftimin e tyre.
Vaksinimi i punëtorëve shëndetësorë kosovarë në Kukës ka filluar nga dita e djeshme, ndërsa do të vazhdojë edhe sot. Sipas Federatës Sindikale të Shëndetësisë, 500 do të jetë numri i të vaksinuarve në këto dy ditë.