Në udhëkryqin që ndodhet në rrugën “Uilliam Uoker” tek “Ura e Xhevrijes” në Prizren, në të cilin qarkullojnë automjete të shumta, prej kohësh nuk janë duke punuar semaforët, me ç’rast po krijohen edhe tollovi të shumta që po e pengojnë në masë të madhe qarkullimin normal të automjeteve në këtë pjesë të qytetit.
Po t’ia shtosh kësaj edhe punimet nëntokësore që janë duke u zhvilluar në këtë rrugë, në afërsi të këtij udhëkryqi, kolonat e gjata të automjeteve tashmë janë bërë përditshmëri në këtë fundvit.
Si pasojë e kësaj gjendje të krijuar, në këtë udhëkryq edhe aksidentet e shumta janë të pashmangshme, shkaku i ç’orientimit të vozitësve për shkak të mungesës së funksionimit të semaforëve dhe tollovisë së automjeteve në rrugë për shkak të punimeve.
Dikush duhet të merret seriozisht me këtë problematikë, sepse komunikacioni në Prizren tashmë është ngarkuar edhe nga automjetet e bashkëatdhetarëve, të cilët kanë ardhur në vendlindje me rastin e festave të fundvitit. /TV Prizreni
