Në Departamentin e Krimeve të Rënda të Gjykatës Themelore në Prizren, ka dështuar të mbahet gjykimi ndaj ish-drejtorit të Inspektorateve Bujar Nerjovaj, raporton Drejtësia Sot.
Shkak për mos mbajtje të kësaj seance ishte mungesa e anëtares së trupit gjykues, gjyqtares Ajser Skenderi, e cila ishte e angazhuar me punë në Këshill Gjyqësor të Kosovës.
Vlen të ceket se përkundër se trupi gjykues nuk ishte në përbërje të plotë, gjyqtari çështjes ka aprovuar propozimet e palëve procedurale që në seancën e radhës të dëgjohen deshmitarët I.O., dhe F.H. Andaj në pamundësi që të procedohet më tutje në këtë çështje, kryetari i trupit gjykues, gjyqtari Xeladin Osmani vendosi qe seanca e radhës të mbahet 29 prill 2022 me fillim nga ora 10:00.
Ish-drejtori Nerjovaj po akuzohet se gjatë periudhës 2011-2013, nuk i ka siguruar kushtet për t’i ekzekutuar konkluzionet e lëshuara nga inspektorët e ndërtimtarisë, për rrënimin e detyrueshëm të mbindërtimeve dhe ndërtimeve të katër objekteve hoteliere në afërsi të sheshit “Shatërvan” në Prizren.
Kujtojmë se Gjykata Themelore e Prizrenit, më 03 qershor 2019, e kishte shpallur fajtor dhe e kishte gjykuar me dënim me burgim në kohëzgjatje prej 6 muajsh, ish drejtorin e Inspektorateve Bujar Nërjovaj.
Mirëpo rasti ishte kthyer në rigjykim, pas ankesës së parashtruar nga avokati mbrojtës Blerim Mazreku.
Drejtësia Sot