Ish-komandanti i UÇK-së në Zonën Operative të Llapit, Rrustem Mustafa – Remi, njofton se më 01.11. 2023 ka marrë ftesë nga zyrtarët e Dhomave të Veçanta të Prokurorisë Speciale të Kosovës, për t`u paraqitur për intervistim më 3.11.2023, por, më pas, nga të njëjtit zyrtarë, dje pasdite, përmes një thirrjeje telefonike, i është konfirmuar se intervistimi i tij nga ZPS-ja është anuluar.
Ish-komandanti i UÇK-së e ka konfirmuar në rrjetin social Facebook, se dje, pasdite, përmes një thirrjeje telefonike dhe, pastaj, një sms-je dhe email-i, i është anuluar intervistimi nga ZPS-ja.
“Në mbrëmjen e dt. 1.11. 2023, nga zyrtarët e Dhomave të Veçanta të Prokurorisë Speciale të Kosovës, kam pranuar një ftesë për t’u intervistuar sot, me 3.11.2023, në ora 09:00. Në ndërkohë, po nga të njëjtit zyrtarë, dje pasdite, fillimisht përmes një thirrjeje telefonike dhe pastaj një sms-je dhe email-i, m’u konfirmua se intervistimi im nga ZPS-ja është anuluar”, ka shkruar Mustafa në Facebook.
Mustafa thotë se, si në të kaluarën, ashtu edhe sot, por edhe nesër e kurdo që është nevoja, ai është i gatshëm për të dhënë kontributin e tij në favor të drejtësisë.
“Lufta e UÇK-së ka qenë luftë mbrojtëse dhe çlirimtare, ashtu siç thonë edhe miqtë ndërkombëtarë. Luftë më të drejtë dhe më të pastër (për aq sa, pastërtinë e tillë e mundësojnë rrethanat e luftës) nuk njeh historia e njerëzimit. Jam me fat që kam qenë njëri nga protagonistët e kësaj lufte, dhe të vërtetën e saj jam i gatshëm ta mbroj në çfarëdo cilësie. Falë luftës së UÇK-së, jo vetëm Kosovës, por edhe rajonit, i është hapur rruga e integrimit në familjen evropiane, aty ku e kemi vendin ne si komb dhe si shoqëri”,shkruan Mustafa.