Archie Battersbee, 12-vjeç, ka ndërruar jetë në Londër, pasi që mjekët me vetëdije ia fikën aparatet që e mbanin gjallë, e siç raportojnë mediat botërore – ka qenë një betejë ligjore mes prindërve dhe mjekëve rreth kësaj çështje.
Siç raporton BBC, familja e djaloshit që ishte në koma nga prilli, nuk ia ka arritur qëllimin që të birin e tyre ta zhvendosin nga spitali në një institucion për mjekësi paliative, transmeton Telegrafi.
Ditët e tij të fundit i kaloi në spitalin Royal Londron në Whitechapel në lindje të Londrës, ku ndërroi jetë pasi që ia fikën aparatet – e sot këtë e ka konfirmuar e ëma e tij.
“Kemi luftuar deri në fund. Jam krenare që jam e ëma e tij”, tha ajo para gazetarëve.
Vendimin për t’i dhënë fund jetës së Archie e mori gjykata, pasi që familja e të ndjerit kishte kërkuar ndërhyrjes e gjykatës evropiane për të drejtat e njeriut.
Atje u refuzuar kërkesa me arsyetimin se kjo nuk është kompetencë e tyre. Ka qenë hapi i fundit në betejën ligjore që prindërit e Archie kishin tentuar ta mbajnë të birin gjallë, pasi që gjyqtari dha verdiktin se duhet fikur aparatet që e mbanin gjallë.
Katër muaj më parë – përkatësisht më 7 prill, Archie është gjetur pa ndjenja nga e ëma Hollie Dance në shtëpinë e tyre në Essex.
Hollie asokohe pati thënë se djali i saj ka marrë pjesë në një sfidë në TikTok, siç është “blackout” apo “hold your breath”.
Djaloshi kishte pësuar lëndime të rënda në tru dhe mjekët besojnë se truri i tij ka vdekur. Archie menjëherë është vendosur në aparate që e mbanin gjallë – që përfshin ventilimin mekanik dhe ilaçet.
E vendimi është marrë të premten, ku u konstatua se nuk është e nevojshme që Archie të dërgohej në një institucion të medicinës paliative. /Telegrafi/