Në ambientet e shtëpisë së kulturës “Xhemajli Berisha” në Prizren, përmes një akademie përkujtimore u shënua 26-vjetori i operacionit ushtarak “Shigjeta”, një nga betejat më të rëndësishme të Ushtrisë Çlirimtare të Kosovës gjatë luftës për çlirim.
Në këtë ngjarje përkujtimore morën pjesë ish-pjesëtarë të UÇK-së nga beteja të ndryshme në Kosovë, Maqedoninë e Veriut dhe Kroaci, familjarë të dëshmorëve, qytetarë të shumtë si dhe përfaqësues të institucioneve lokale dhe qendrore.
Ish-eprori i UÇK-së në operacionin “Shigjeta”, Rrahim Bekteshi, në fjalën e tij theksoi se nderimi i heronjve është një dëshmi e qartë se lufta për çlirim ishte e drejtë dhe e domosdoshme.
“Respekti për dëshmorët është nderim për historinë tonë dhe përpjekjet shekullore për liri nga pushtimi serbo-sllav,” u shpreh ai.
Ministri në detyrë i Mbrojtjes, Ejup Maqedonci, theksoi rëndësinë strategjike të operacionit, duke e cilësuar atë si një ndër momentet kyçe të historisë së UÇK-së.
“Operacioni ‘Shigjeta’ ka qenë dhe mbetet një nga aksionet më të lavdishme të rezistencës sonë ushtarake”, tha ai.
Deputetja Sala Jashari theksoi bashkëpunimin e ngushtë mes UÇK-së dhe NATO-s gjatë atyre ditëve të lavdishme, duke theksuar se qëllimi ishte i përbashkët – çlirimi i Kosovës nga regjimi serb.
“Operacioni ‘Shigjeta’ dhe ndërhyrja e NATO-s ecën paralelisht drejt të njëjtit qëllim: liria e Kosovës”, u shpreh ajo.
Ndërkaq, koloneli Ervin Shkaçan nga shoqata e veteranëve të luftës “Tigrat” të Kroacisë, i pranishëm në akademi, falënderoi organizatorët për nderimin e bashkëluftëtarëve dhe theksoi lidhjen e fortë mes popujve që ndanë të njëjtën përvojë në rrugën drejt lirisë.
Operacioni “Shigjeta”, i zhvilluar në rajonin e Pashtrikut, kishte për qëllim sigurimin e një fitore ushtarake strategjike dhe krijimin e kushteve për një ofensivë tokësore të përbashkët mes UÇK-së dhe forcave të NATO-s, në funksion të çlirimit të plotë të Kosovës nga regjimi serb./TV Prizreni/
Marketing
