Një monument shumë i veçantë arkeologjik, është zbuluar sot gjatë punimeve në “Sheshin i Lidhjes” në qytetin e Prizrenit.
Pas informacionit se punëtorët që janë të angazhuar në realizimin e projektit tek sheshi i Lidhjes në Prizren, kanë hasur në një monument të vjetër është informuar edhe arkeologu Shafi Gashi , drejtor i Institutit Arkeologjik i Kosovës.
“Në këtë vend mund të zbulohen terma Romake, të antikitetit, të shekullit të II-të ose të III-të, të erës sonë”, tha Gashi.
Sipas tij, duke u bazuar në literaturën e mëhershme të xhamisë së vjetër dhe Shkollës së Priftërinjve, “ky vend, mund të na qojë në një kompleks të tërë të kësaj periudhe”.
“Në aspektin shkencorë, ky objekt mund të konfirmojë se, Prizreni është ndërtuar mbi një qytet të antikitetit të vonë.
“Deri më tani nuk janë gjetur materiale të lëvizshme, por gjatë procedurave të mëtutjeshme, mund të hasim në to , thotë Gashi. Gjatë punës së operatorit ekonomik, ky lokacion është dëmtuar pak, por sipas ekspertëve, të gjitha materialet e nxjerra, do të vendosen sipas pozicionit fillestarë. Nëse ky vend nxjerr gjurmët e qytetit të vjetër të quajtur “Therandë”, mendohet të jetë një lokacion atraktiv për vizitorë.
Ndërkaq, më i rezervuar në informacione ka qenë Samir Hoxha, drejtor i Qendrës Rajonale të Trashëgimisë Kulturore. Ai shprehet se, pas sondazheve do të vazhdohet me procedura të tjera. /TV Prizreni/