Me një bashkëbisedim të përbashkët të drejtorit ekzekutiv, Dr. sci. Afrim Avdaj dhe drejtorit të Infermirisë, Shyqri Hasani me infermierë dhe infermeriere, si dhe ndarjen e mirënjohjeve për më të dalluarit, të enjten në Spitalin e Përgjithshëm “Prim. dr. Daut Mustafa” në Prizren është shënuar 12 Maji – Dita Ndërkombëtare e Infermierisë.
“Infermieria është një segment shumë i rëndësishëm i shëndetësisë. Ajo ka ndikim bazik në mjekësinë në tërësi, ndërsa falë punës, angazhimit dhe përkushtimit tuaj kjo ndjehet nga pacientët në të gjitha fazat e trajtimit dhe mjekimit. Për më tepër, nuk mund të ketë një mjekësi përmbajtësore dhe substanciale pa një infermieri bazike, të begatë dhe të përkushtuar për ofrimin dhe ngritjen e cilësisë së shërbimeve për pacientë”, tha drejtori ekzekutiv, Dr. sci. Afrim Avdaj, duke falënderuar dhe ofruar përkrahjen për krijimin e kushteve sa më të mira për punë dhe ngritje të cilësisë së shërbimeve.
“Më lejoni që në këtë ditë të shënuar të ju falënderoj për punën, angazhimin dhe kryerjen e të gjitha detyrave dhe obligimeve të përbashkëta, me qëllim të ofrimit dhe ngritjes së cilësisë së shërbimeve për pacientë, që janë rrugëtimi më i mirë për avancimin e infermierisë, si një nga shtylla e mjekësisë”, – pohoi drejtori i infermierisë, Shqyri Hasani, duke falënderuar drejtorin ekzekutiv për mbështjen dhe përkrahjen e vazhdueshme për krijimin e kushteve sa më të mira për punë dhe avancimin e infermierisë.
Në këtë ditë të shënuar janë ndarë mirënjohje për infermierë dhe infermerieret e dalluara të gjitha reparteve të Spitalit Spitalit të Përgjithshëm “Prim. dr. Daut Mustafa” në Prizren.
Në emër të shpërblyerve ka falënderuar, Leonora Hoxha, kryeinfermiere në repartin e Gjinekologjisë./PrizrenPress.com/