Nëndega e LDK-së në Prizren “ 2 Korriku”, ka organizuar një mbrëmje të përbashkët me veteran të arsimit dhe pronarë të shtëpive shkolla me rastin e festës së 7 Marsit.
Kryetarja e Nëndegës, Afërdita Morina- Biffar, vlerësoi përkushtimin dhe sakrificën e mësimdhënësve veteranë dhe pronarëve që hapen dyert e shtëpive të tyre për edukimin dhe arsimimin e rinisë sonë , duke iu kundërvënë armikut të pashembullt në një kohë të okupimit të egër.
Edhe kryetari i degës së këtij subjekti politik në Prizren, Haxhi Avdyli, vlerësoi kontributin e veteranëve të arsimit dhe pronarëve të shtëpive shkolla, ndërsa veçoi përkushtimin e shpërndarësve të dijes edhe në emancipimin e femrës prizrenase.
Deputeti i LDK-së në Kuvendin e Kosovës, Hatim Baxhaku, tha se është vështirë të gjenden fjalë për kontributin e të gjithë atyre që sakrifikuan gjithçka nga vetja për ta mbajtur gjallë arsimin shqip në kohët më të vështira për Kosovën gjatë dekadës së fundit të shekullit të kaluar. Për veteranët e arsimit dhe pronarët e shtëpive shkolla në këtë takim janë shpërndarë mirënjohje nga organizatorët e këtij aktiviteti/TV Prizreni/