Viti 2019 përfundoi ashtu si edhe nisi – në pritje të ndryshimit që do ta bëjë Kosovën ashtu siç e kemi ëndërruar. Këtë vit, kishte momente kur ëndrra për ndryshim dukej se po realizohej, por më shumë kishte të tilla që na dëshmonin se ankthet do të vazhdojnë…
Vota e ndryshimit
Mesnatën e 6 tetorit Albin Kurti u është drejtuar kosovarëve si kryeministër në ardhje, duke iu shpallur luftë të korruptuarve dhe kapësve të shtetit. E ka bërë këtë pak orë pas “tërmetit” politik që prodhuan zgjedhjet e jashtëzakonshme të 6 tetorit, ku partitë që përbënin opozitën e kaluar arritën të fitojnë mbi 50 për qind të votave. Ndryshimi i vendosur më 6 tetor u vlerësua si produkt i votës së zhgënjimit e ndëshkimit me qeveritë e pas pavarësisë.
LVV-ja ka mbërritur të bëhet partia më e madhe në vend, duke u prezantuar si alternativë e vetme që mund të sjellë ndryshime, ndryshe nga të gjitha subjektet e tjera politike që ishin provuar në pushtet. Vetëvendosje u shpall subjekt fitues, me 221 mijë vota dhe do ta ketë grupin më të madh parlamentar në Kuvend. Ky subjekt do t’i ketë 29 deputetë, kurse LDK-ja, si e dyta me 28 sosh. LVV-ja i fitoi zgjedhjet edhe pse ka më pak se dy vjet prej kur ky subjekt politik pësoi një goditje nga brenda. Menjëherë pas zgjedhjeve të 2017-s, iu shkëputën 13 deputetë – 12 prej tyre kaluan në PSD dhe një në AAK, shkruan Koha Ditore.
Me gjithë zotimet e dhëna para dhe gjatës fushatës zgjedhore, LDK-ja dhe LVV-ja deri në fund të dhjetorit nuk arritën ta finalizojnë marrëveshjen për koalicion. Derisa programi qeverisës u dakordua në plotni, ngërçi në negociata u shkaktua kur në rend dite ishte ndarja e hisesë së pushtetit. LDK-ja kërkon që pjesë e kulaçit të jetë edhe posti i presidentit, por kjo është kundërshtuar nga Vetëvendosje që proklamon domosdoshmërinë e nxjerrjes së një kandidati konsensual.
Krahasuar me zgjedhjet e kaluara, edhe dalja e qytetarëve më 6 tetor ka qenë më e lartë me 44 për qind. Në zgjedhjet parlamentare të vitit 2017 dalja ishte 40,91 për qind, kurse në zgjedhjet e vitit 2014 përqindja e votuesve ishte 42,48 për qind.
Zgjedhjet u mbajtën pas dorëheqjes së papritur të kryeministrit Ramush Haradinaj, akt të cilin e arsyetoi me thirrjen që ia bëri Gjykata Speciale për ta intervistuar në cilësinë e të dyshuarit për krime lufte. Por, Haradinaj i hyri garës duke kërkuar edhe një mandat si kryeministër, tani jo nëpërmjet PDK-së. Por AAK-ja arriti të dalë vetëm e katërta ani se ndodhej në koalicion me Partinë Socialdemokrate (PSD), në të cilën prej gati dy vjetësh zhvillojnë aktivitet 12 deputetë që e braktisën LVV-në.
Rënie të madhe pësoi edhe Partia Demokratike (PDK), e cila për herë të parë që nga 2007-a e ka humbur primatin. Madje, vota e ka zhvendosur në subjekt të tretë.
Në mungesë të reformës, edhe në këto zgjedhje dolën në pah defektet e sistemit, ku vetëm numërimi, rinumërimi, si dhe afatet e ankesave konsumuan dy muaj kohë deri në certifikim të rezultateve. Stërzgjatja e këtij procesi nuk e ndryshoi rezultatin fillestar, përveçse koalicioni Nisma-AKR arriti t’i mbijetojë pragut për një grusht votash.
Me përjashtim të incidenteve në disa komuna, procesi është vlerësuar të jetë i rregullt nga vëzhgues vendorë e ndërkombëtarë. Derisa në komunat me shumicë shqiptare pati garë konkurruese në zonat e populluara me shumicë serbe, ambienti i fushatës u dëmtua nga kërcënimet brenda komunitetit serb, duke i vënë në shënjestër subjektet politike jashtë Listës Serbe. Edhe këto zgjedhje, subjekti që mbështetet prej Beogradit zyrtar arriti t’i fitojë të gjitha 10 vendet e garantuara në Kuvend…