Shefi i zyrës ndërlidhëse të Greqisë në Kosovë, Dimitris Moschopoulos, ka thënë se mosnjohja e pavarësisë së Kosovës nga ana e Greqisë po ndodhë për disa arsye komplekse. Mirëpo, sipas tij, njohja, kurdo që të ndodhë, do të jetë një moment shumë i veçantë për Greqinë, ani pse ai nuk përmendi ndonjë datë të mundshme.
“Parashikimi se kur do të ndodhë njohja është njësoj si të parashikohet devalvimi i parasë, gjë që nuk mund të parashikohet”, tha Moschopoulos gjatë një ligjërate në një prej universiteteve të vendit, citon koha.net.
Duke folur për integrimet euro-atlantike, Moschopoulos tha se Greqia e mbështetë Kosovën në integrimin e saj në BE, por sipas tij, për të ndodhur një gjë e tillë, Kosova duhet të njihet nga të gjitha shtetet anëtare të BE-së.
Diplomati grek në Kosovë shtoi se shteti i tij ka inkurajuar shtetasit e Greqisë, po ashtu edhe ata të Kosovës, që të ketë liri të lëvizjes në mes të dy vendeve.
“Tani Greqia vizat për kosovarët do t’i vë në pasaportë edhe pse ende nuk e ka njohur Kosovën. Qytetarët e Kosovës do të kenë lëvizje të lirë me vizat greke në të gjitha vendet e Schengenit, me përjashtim të Spanjës, e cila poashtu nuk e ka njohur Kosovën”, tha ai.
Ai shtoi se Greqia beson në të ardhmen e saj në BE dhe në NATO, duke shprehur mbështetjen e integrimit të gjithë Ballkanit Perëndimor.