Gjuha shqipe në Maqedoni vazhdon të mos pranohet nga një pjesë e qytetarëve, kurse shkarravitjet e tabelave me mbishkrimet shqipe janë shndërruar në përditshmëri.
Por nuk mungojnë as shkarravitjet e mbishkrimeve në tabelat me gjuhën maqedonase, nga grupe të caktuara njerëzish. Qytetarët janë shprehur se kjo është rezultat i sjelljes së paedukatë të disa individëve.
“Averzioni ndaj gjuhës së komunitetit të dytë më të madh në Maqedoni, është i theksuar në shumë segmente. Shkarravitja e mbishkrimit në gjuhën shqipe në tabelat në rrugë, vazhdon të jetë një problematikë në vendin tonë”, ka thënë një qytetar, raporton Alsat.
Zyrtarë nga Drejtoria e Ndërmarrjes Publike për rrugë, kanë njoftuar se megjithë përpjekjet së vazhdueshme për eliminimin e këtij problemi, përsëri paraqiten persona që bëjnë shkarravitjen e tabelave.
“Ne punojmë në vazhdimësi në eliminimin e këtij problemi, mirëpo gjithmonë paraqiten persona të cilët shkarravisin tabelat në rrugë. Kjo ndodh edhe në komunat me shumicë maqedonase, edhe në atë me shumicë shqiptare. Mbishkrimet shkarraviten në të dyja gjuhët”, ka thënë Sinisha Ivanovski, drejtor i Ndërmarrjes Publike për Rrugë dhe rrugica.