Rreth pesëdhjetë nxënës afër liqenit të Batllavës gjatë verës shkojnë në shkollë me barka kurse gjatë dimrit ata ecin nëpër akull. Në një emision televiziv që është emetuar në RTK, prindërit i kanë bërë apel qeverisë që të bëj një zgjidhje para se të ndodhë ndonjë tragjedi.
Anijet janë të vjetra. Ka ndodhur që anija e ka lëshuar ujin. Po të mos kishte qenë anija tjetër afër do të ishin mbytur mbi 10 nxënës,” ka thënë Bashkim Ibishi, banor afër liqenit të Batllavës.
Pasi ka parë problemin, Ministri i Arsimit Ramë Buja ka premtuar se do të gjej një zgjidhje.
“Unë besoj se këtë çështje do ta paraqesë së shpejti në qeveri tek ministritë përkatëse që duhet të merren me këtë çështje dhe a do të bëhet urë, a do të bëhet rrugë si thuhet harkore atë do ta shohim bashkë. Kjo çështje kërkon zgjidhje dhe besoj se nuk do të vonohet”, ka thënë ministri Ramë Buja duke u përgjigjur qytetarëve për problemet në arsim në emisionin “Unë Pyes”.
I pyetur nga një student nëse është konflikt interesi pasi Buja jep mësim edhe në një kolegj privat ai ka thënë se “nuk është konflikt ligjor e as moral siç po e quan dikush sepse në fakt unë me profesion jam profesor dhe këtë e bëj për ta mbajtur kontinuitetin, asgjë më shumë.”
Prindërit poashtu janë ankuar se fëmijët duhet të bartin shumë libra dhe çanta e tyre arrin peshën mbi pesë kilogramë.