Kryesia e Organizatës së Veteranëve të Luftës së UÇK-së, nëpërmjet një komunikate për media ka treguar se në mbledhjen e rregullt të mbajtur sot me 13 janar 2015 ka shqyrtuar mes tjerash mosregjistrimin e studentëve të kategorive të dalura nga Lufta e UÇK-së.
Kryesia ka marrë vendim që të padis në gjykatë Rektorin e UP-së, për mosrespektim të Memorandumit, gjatë kohës sa ai ishte në fuqi. Prishja e njëanshme e Memorandumit nga Rektori, vlen për vitin e ardhshëm akademik, e assesi për vitin akademik 2014/15, kur Memorandumi ishte në fuqi.
“Duke e konsideruar këtë akt si shumë të papërgjegjshëm si dhe tallje me Organizatat si palë nënshkruese dhe studentët që ka shumë muaj që kanë filluar të ndjekin studimet, padia në gjykatë është e domosdoshme.
Ne si Organizatë, kemi kryer të gjitha obligimet sipas Memorandumit, proces mjaft i vështirë dhe delikat, njëkohësisht organet kompetente ftohen që të kontrollojnë e verifikojnë listën tonë, për saktësinë e të cilës ne japim përgjegjësi të plotë, thuhet në fund të komunikatës së kryesia e OVL të UÇK-së.