Tejkalimi i ngërçit politik është i lehtë nëse politikanët do të mendonin për institucionet e Shtetit para interesave private. Edhe zgjedhjet e reja janë opsion për të dalë nga kjo situatë. Aleanca Kosova e Re është duke u rikonsoliduar. Në shtator do të mbahet Kuvendi i Jashtëzakonshëm i AKR’së dhe aty do të dalin institucionet e reja. Presidenti i AKR’së, Behgjet Pacolli flet për Express.
Express: Si e shihni zgjidhjen e ngërçit politik të krijuar pas zgjedhjeve nacionale?
B. Pacolli: Nuk jam i kualifikuar të flas për këtë temë pasi s’e kam kaluar pragun zgjedhor. Sidoqoftë, nëse njerëzit që janë të përfshirë në këtë proces mendojnë për qytetarët, nëse mendojnë për të mirën e qytetarëve, nëse mendojnë për të mirën e Kosovës, nëse mendojnë për të mirën e institucioneve e kanë shumë lehtë me gjet zgjidhje. Mirëpo, derisa ata të merren me pozitat dhe karriget, ngërçi politik nuk zgjidhet kështu. Gjithmonë janë dy gjëra që njeriu sakrifikon për vendin. Njeriu i sakrifikon interesat e veta për qytetarët dhe institucionet ose e kundërta. Po më duket se ngërçi i krijuar tash është për shkak se po ndodh e kundërta për shkak se po sakrifikohen institucionet e Kosovës për interesa private.
Express: Çka është duke ndodhur me Aleancën Kosova e Re?
B. Pacolli: Ne jemi duke u rikonsoliduar dhe jemi duke punuar me Degët e AKR’së për të ecur më tutje. Diku në shtator do të kemi një rikonsolidim total të AKR’së.
Express: Do të jeni ju apo do të ketë një udhëheqës të ri të AKR’së?
B. Pacolli: Nuk e di, për këtë vendos Kuvendi i Jashtëzakonshëm i AKR’së, i cili do të mbahet në shtator.
Express: Cila është analiza juaj se pse nuk e kaluat pragun elektoral prej 5 përqind?
B. Pacolli: Ndoshta s’kemi qenë ne konform asaj që qytetarët e Kosovës e kërkojnë. Ne s’kemi ditur të shajmë, s’e kemi fyer askënd, s’kemi ditur të shantazhojmë askënd, s’kemi ditur të vjedhim. Por, kemi punuar për institucionet dhe kemi qenë shumë më tepër institucional se sa të merremi me punë private e klanore. Ky është konkluzioni im nga analiza që kemi bërë.
Express: Është përmendur mundësia që AKR në të ardhmen të quhet Partia Liberale e Kosovës. Është e vërtetë kjo?
B. Pacolli: Ne jemi parti liberale. Nuk besoj se do ta ndërrojmë emrin. Ne jemi parti liberale e dëshmuar. Ne jemi qind për qind në të gjitha mekanizmat ndërkombëtare të liberaleve evropianë dhe nuk besoj se do të ketë nevojë që të ndërrohet emri i AKR’së.
Express: Sa jeni të gatshëm të hyni në zgjedhje të reja të jashtëzakonshme për shkak të situatës së krijuar politike?
B. Pacolli: Besoj se po. Unë besoj se do të shkojmë prapë në zgjedhje dhe mund të jenë një opsion për të tejkaluar ngërçin insitucional, duke shpresuar se qytetarët e kanë kuptuar se çfarë janë në gjendje të bëjë skena politike. Besoj se ne nuk i mbetemi borxh asnjë qytetari dhe asnjë institucioneve. Me krejt potencialin që kemi pasur kemi punuar. Të gjitha kapacitete tona i kemi shfrytëzuar në favor të qytetarëve dhe të shtet-ndërtimit. Ne nuk e kemi keqpërdor të mirën e qytetarëve. Nuk e kemi keqpërdorë buxhetin e Kosovës dhe kemi punuar aq sa kemi mundur. Dhe, normalisht qytetari më së miri është dashur ta vlerësojë.